تجربة طالبة بجامعة Grenoble فرنسا
أنا صيدلانية وطالبة ماستر حاليا بجامعة Grenoble Alpes University بمنحة من CBH Graduate School
حابة شارككن تجربتي المتواضعة بالتقديم ..
من سنة ونص ماكان عندي أي فكرة عن الأوراق المطلوبة ولا كيفية البحث ولا التقديم .. باختصار زيرو خبرة
قعدت مع رفقاتي يلي قدمو ورح يسافرو .. اخدت لمحة عمومية بس الشي الأهم ال اخدتو منن هو (الدافع)
بلشت دور وتابع كل قنوات ومواقع المنح .. اخد فكرة كل منحة شو بتقدم وشو بتطلب .. ترتيب الجامعات والاختصاصات ..
بأول ال٢٠٢١ جهزت ملف أوراقي الجامعية كلا ..
وبلشت بتحضير رسالتي الدافع (للتقديم لل٢٠٢٢-٢٠٢٣)
لأن كان أملي ضعيف بإني لحق لهي السنة وكلشي كنت مفكرة فيه هو المنح التنافسية الكبيرة (تشيفننغ، سعيد ، ايراسموس ..)
بتشجيع من صديقتي عرفت انو التقديم عفرنسا ببلش بالربع التاني من السنة تقريبا ومعي وقت حاول
شديت همتي برسالة الدافع، اخدت مني حوالي ٣ شهور مع استشارة أصدقاء للتعديلات النهائية
(كتير كتير مهم تكون الرسالة كتابتكن، ماكنت بعرف عنها شي بس في كتير مواقع بتساعد لتعبرو عن حالكن بالطريقة المناسبة)
بعد ماتأكدت بالمراسلة مع الجامعة أنها بتقبل فحص ديولينغو لإثبات شهادة اللغة
قدمت الفحص أونلاين والحمدلله جبت علامة كويسة من أول محاولة
(معكن محاولتين خلال ٣٠ يوم بعد الدفع، بأول مرة حاولت فصل شحن اللابتوب فكتير انتبهو لظروف النت والكهربا)
(من أسباب تأخري بالتقديم كانت الصعوبة المادية للنزلة علبنان لتقديم ال IELTS فهالسنة رح يصير أونلاين وأخيرا ..تابعو الموضوع)
قدمت ع جامعة Grenoble Alpes و عجامعة Paris Saclay
ماوصلت لمرحلة المقابلة بجامعة باريس لأن كان بدن خبرة عملية الها صلة بالاختصاص وخبرتي بعيدة عن المجال
المنحة اللي قدمت عليها هي منحة IDEX (بجامعة غرنوبل منحة IDEX بتم التقديم عليا بنفس طلب التقديم عالاختصاص
أما بجامعة باريس الطلبين مستقلين ولازم يتقدم عالاختصاص قبل بوقت منيح من الديدلاين لحتى تدرس الجامعة الطلب وترشح اسمكن للمنحة)
الف الحمدلله بالشهر الخامس اجاني القبول الجامعي، بالشهر السابع اجتني منحة من CBH ( الجامعة لحالها رشحتني للمنحة أنا ماقدمت عليا، قدمت ع IDEX، وتنيناتن نفس القيمة المادية)
وبلشت رحلة التحضير للسفر
نصائح مستفادة:
لاتركزو بس عالمنح الكبيرة ..في منح كتير بتخص كل جامعة ومابينعلن عنها بس اذا فتو عموقع الجامعة والمنح ال بتدعما بتلاقو كلشي
خدو بعين الاعتبار المنح الجزئية متل يلي بتمول جزء وبتدين جزء وبتستردو بعد ماتشتغلو
( متل آغا خان أو البنك الإسلامي) أنا هلا قدّرت أنو رد المبلغ رح يكون يسير بعد ماتصيرو برا
الأهم انو تشتغلو طاقتكن وتتوكلو عالله .. ممكن تزبط وممكن لا بغض النظر عن مستواكن وخبراتكن
خلو في بلان B و C و D ولا توقفو شغلكن ونشاطاتكن الاساسية خلال التقديم
(كملت شغلي وتطوعي وبنفس الوقت ال اجتني فيه المنحة اجاني قبول من الجامعة الافتراضية بماستر المعلوماتية الحيوية)
دعم الأشخاص الإيجابيين من أكبر عوامل النجاح ..
منحة CBH Graduate School الموقع الرسمي
http://grad-chembiohealth.univ-grenoble-alpes.fr/…/cbh…/
منحة GRAL (Grenoble Alliance for Integrated Structural & Cell Biology)
للعودة لتجارب الطلاب عبر موقعنا ننصحك بمتابعة الرابط التالي:
للعودة إلى الموقع
