تجربة طالب بالحصول على منحة DAAD للدراسة في المانيا
مرحبا انا حاصل على منحة DAAD-2018-2019 للدراسة بالمانيا
وهي تجربتي ممكن تفيد.
بال ٢٠١٣ قرات عن المنح وبلشت اتعلم شو يعني منحة ومن وقتا لهلا وانا حلمي احصل على منحة
واخيرا حصلت ولله الحمد(المنحة هي استقلال مادي حتى التخرج من الجامعة)
الاوراق المطلوبة
كانت الاوراق المعتادة من رسالة دوافع وخطاب توصية وشهادات
-رسالة الدوافع:اتعلمت كيف بتنكتب من بروفايل الدكتورة شذى الخليل
نزلت كتب من على الانترنت ل شوف نماذج عنها (احد الكتب كان افضل ٥٠ رسالة دوافع حصلت عليها جامعة هارفارد)رسالة الدوافع هي برايي اهم شي للمنحة
وهي ب اختصار طريقة تسويقك لنفسك وطريقة لتقنع المنحة انك شخص مهتم وبدك تدرس ومو جاي تلعب
طبعا لازم تكون قوية جدا وصحيحة املائيا وقواعديا
الفكرة الاساسية برسالة الدوافع عندي موجودة من ال٢٠١٤ ومن يوما لهلا وانا بحسن عليها وبعدلا
رسالة الدوافع اخدت كل تفكيرة ل فترة كبيرة وصرت وانا بالغرفة، بالشارع، بالسرفيس او بالجامعة
عم فكر شو لازم اكتب او شو ممكن اكتب ل حتى لقيت فكرة بتناسبني وجديدة وبتقنع الجهة يلي مقدملها فيني.
يعني برايي مو ممكن رسالة دوافع تنكتب ب يومين
خطاب التوصية من دكتور الجامعة..ب هي المنحة كانو طالبين انو دكتور الجامعة يكتب خطاب توصية ويبعتو بالبريد للمنحة ب المانيا.
وانا بحكم اني متخرج من ٢٠١٥ ف هالشي كان شبه مستحيل عندي بس مع ذلك مااستسلمت.
ارفقت بوراقي خطابات التوصية تبع دكاترة الجامعة من ال٢٠١٥ وطلبت من اساتذتي ب كورس اللغة يكتبولي رسائل توصية ويبعتوهن بالبريد لعندن.
والحمد الله مشي الحال.
-اوراق الجامعة مجهزهن من اكتر من ٣ سنين.
لذلك مااتعذبت ابدا بالتقديم للمنحة.
ل هيك نصيحتي ل اي شخص بدو يقدم ع منحة يجهز اوراقه بكير كتير..
البروفايل تبعي:انا طالب متخرج اقتصاد بال ٢٠١٥.
علاماتي مانهن خارقين ولا حتى ممتازين.
معي C1 باللغة الالمانية..DSH2 ومعي B2 باللغة الاجنبية..TOEFL
حاصل على منحة مليون مبرمج عربي حاصل على منحة من Otto benecke Stiftung عندي خبرة عملية بسيطة واخيرا والاهم معي قبول من الجامعة لدراسة الماستر بالاقتصاد
شو بتغطي المنحة؟
- المنحة هي كالتالي_850 € لطلاب الماستر شهريا.
- بالاضافة ل تكت طيارة روحة رجعة
- تامين صحي
- مساعدة اجار بيت في بعض الحالات
- كورس لغةللمتزوجين
- مساعدة شهرية للزوجة
- مساعدة شهرية للطفل إن وجد تحت شروط معينة
- كورس لغة للزوجة احيانا
أهم شي لازم تعرفوه انو انا قدمت على منحة ال DAAD بال٢٠١٦ ورفضوني
ورجعت قدمت بال ٢٠١٨ وقبلوني.
والسنة الماضية قدمت على اربع او خمس منح..
ويلي قبلها ما بعرف على كم منحة.
وكلو رفض.. والفصل الماضي اجاني رفض من ٣ منح
لدرجة لما اجاني ايميل من DAAD قلت لحالي (يلا رسالة رفض تانية.. لاحول ولا قوة الا بالله) وكانت مفاجاة كبيرة لما طلعت رسالة قبول ومو رفض.اخيرا
اذا في نصيحة ل اي حدا بدو يقدم على منحة هي لا تيأس وضل قدم مانك خسران شي.
رح تتكلف مرة وحدة بالاوراق بس بعدين خلص ماعاد في اي تكلفة تانية
شروط المنحة مهمين جدا ولكن اذا في شرط مانك محققو..
ف عادي قدم.. بكرر انك مو خسران شي.
مو شرط كل الشروط تتحقق بحرفيتها.
احيانا لما مل من قصة المنح بقول (بحياتي ما رح احصل على وحدة ) ف كنت دور عالشرط يلي ماني محققو مشان ما اقدم, وهالشي ضرني وأخرني.
طبعا في شروط لا يمكن التغاظي عنها.. يعني المنحة موجهة ل بلد فلان ومو للسوريين. ف مافيك ك سوري تقدم عليها!
رابط التقدم لمنحة DAAD:
للعودة إلى الصفحة الرئيسية: