تجربة منحة سعيد لدراسة الماجستير
منحة سعيد لدراسة الماجستير في بريطانيا -ممولة بالكامل (Fully Funded)- :
رح أحكي في البوست الحالي عن تجربتي بالحصول على منحة سعيد خلال سنة 2019-2020
كلها (((آراء شخصية ))) مبنية من تجربتي ونصائح ومساعدات الطلاب الاخرين
بالتالي ممكن حدا يكون عندو رأي تاني ببعض النقاط ..أو في شي تفصيلي يتغير بالمستقبل
أنا كتير بنصح وبشجع عالتقديم لمنحة سعيد لعدة أسباب:
- المراحل والتعليمات تبعها بتشبه منحة تشيفنينغ كتير (مع وجود بعض الاختلافات في كل مرحلة)
بس رغم ذلك هالشي أكيد بيوفر شوية وقت وجهد - فيك نفس الجامعات يللي اخترتها ب تشيفنينغ تختارها ب سعيد (بشرط يكونو من ضمن الجامعات الشريكة ل سعيد) و هالشي بيختصر شوية جهد ووقت اكيد
- كتابة مقالات سعيد وتشيفنينغ متشابهين لحد كبير …صحيح مقالات سعيد مختلفة في بعض النقاط
بس هالشي ممكن يكون مفيد من ناحية انو بيساعدك على ترتيب أفكارك وتنظيمها بشكل مختلف
وبالتالي ممكن يخطرلك أفكار وأساليب جديدة تستفيد منها في تشيفنينغ
أول شي شرح بسيط عن الفرق بالتقديم على المنحة وعلى الجامعات
بدأ منح سعيد وتشيفنينغ هو تمويلك لإكمال دراسة الماجستير بأحد الجامعات البريطانية
لكن تأمين القبول الجامعي هو مهمة الطالب ومافي ارتباط بين الجامعة والمنحة إلا بالمراحل الأخيرة من المنحة (بعد القبول)
يعني عملية التقديم على المنحة والتقديم على الجامعات عمليتين منفصلتين تماماً عن بعض.
وكل وحدة إلها الأبليكيشن الخاص فيها
لكن بنفس الوقت في ارتباط ضمني بينهن لأنو ضمن أبليكيشن المنحة بينطلب منك ذكر هالثلاث كورسات (3 على الاكثر) وكتابة مقالات عنهن
ومطلوب منك مراسلة هالجامعات و تقديم القبول الجامعي للمنحة في حال قبولك بالمنحة (قبول واحد من أحد خياراتك يكفي)
في منحة سعيد مطلوب إنك تكون قدمت على خياراتك الجامعية بموقع الجامعة قبل إرسال الطلب، أما بتشيفنينغ مطلوب ذكر الخيارات فقط
أهم الخطوات في التقديم على منحة تشيفنينغ وسعيد:
ما رح أحكي كتير معلومات تفصيلية عن التقديم لما يكون الحكي مكرر
رح أحكي بس معلومات عامة نوعاً ما بس مهمة ل يللي محتار شلون يصيغ الأبليكيشن تبعو
رح أبدأ بفكرة كتير مهمة وأساسية:
* كيفية تقديم أبليكيشن قوي ومترابط:
المطلوب منك لحتى تقدم أبليكيشن للمنحة هو ذكر شهاداتك التعليمية
وخبرتك العملية (وصف مختصر لدورك ومهامك في كل عمل) وخبراتك التطوعية (بالاضافة ل تعدادها المطلوب كتابة مقالة بتشرح فيها أكتر عن هالعمل التطوعي وكيف دخلت عليه ودورك فيه)
بالإضافة لكتابة مجموعة من المقالات وهيي باختصار
مقالة عن موقف أبرزت فيه مهاراتك القيادية ومقالة عن أهم إنجاز إلك سواء في خبرتك المهنية أو التطوعية
ومقالة عن أسباب اختيارك لاختصاصك و للكورسات والجامعات
وأهمية هالاختصاص لبلدك وخططك المستقبلية على المدى القريب والبعيد
ذلك.. لما بنقول المطلوب تقديم أبليكيشن قوي ومقنع
فهالشي بيعني كتابة المقالات بحيث تكون متناسقة ومترابطة مع بعضها ومع باقي المعلومات المقدمة
بحيث تربط دراستك وخبراتك الماضية بالبرنامج يللي رح تختار تدرسو ومن ثم بخططك المستقبلية
لذلك اختيار الاختصاص وبرنامج الماستر يللي رح تقدم عليه أمر محوري ورئيسي من وجهة نظري ورح أحكي عنو بعد شوي بالتفصيل
ملاحظة: لما بقول لازم يكون في ترابط بين ما سبق
هاد ما بيعني بالضرورة إنو لازم كل حياتك وخبراتك الماضية تكون متمحورة حول اختصاص واحد دقيق وهوي يللي تتابع الدراسة فيه
مو بالضرورة هالشي, ممكن تكون درست اختصاص معين
ومن خلال خبرتك العملية بلشت تتحول لاختصاص جديد قريب عليه وهالشي دفعك لتكمل دراسة بهالاختصاص التاني الجديد
المهم إنك تكتب المقالات بشكل مترابط يوضح بشكل مقنع كيف استفدت من كل مرحلة وقادتك للمرحلة يللي بعدها ويكون شرح خططك المستقبلية بيكمل هالمراحل هي
تحديد الاختصاص المراد دراسته (برنامج الماستر أو الكورس):
master program or postgraduate course
متل ما ذكرنا هي الخطوة مهمة جداً..لأنو كتابة المقالات بجزء كبير منها رح يعتمد عليها
* كيفية اختيار الاختصاص:
الشي البديهي والأكيد إنو على حسب رغبتك بالمجال يللي بتحب تكمل حياتك العملية فيه
كن في نقطة إضافية مهمة في حالة التقديم عن طريق المنح الدراسية وهيي المعيار المعلن من قبل إدارة المنحة بإنو الاختصاص لازم يكون بيساهم في تطوير وبناء بلدك الأم.
في حال كانت رغتبك موافقة للاختصاصات يللي إلها أولوية من قبل إدارة المنحة بيكون كتير ممتاز وبتقدم على نفس الكورس
في حال كان في اختلاف بين رغبتك والاختصاصات المفضلة من قبل إدارة المنحة فالقرار بيرجعلك.
إمّا تلتزم برغبتك و تختار كورسك المفضل وتحاول تقدم أبليكيشن قوي تشرح فيه رغباتك وأهدافك وتربطها بإفادة بلدك بطريقة مناسبة وتقنع إدارة المنحة فيك.
او فيك تحاول تبحث عن كورس قريب شوي عن رغبتك الأصلية وبنفس الوقت بيساهم بتطوير بلدك الأم
ولكن المهم جداً بكل الأحوال تكون مقتنع بالكورس وفهمان تفاصيل الاختصاص مشان تعرف تكتب مقالات قوية عنو وتجاوب عنو بالمقابلة وتكمل حياتك العملية بهالمجال
وما تكون بعدت عن الشي يللي بتحبو وانت شاطر فيه
بعد اختيارك للاختصاص
يعني مثلاُ (Marketing, project management, structural engineering, development economics, public health….)
بيجي دور اختيار الكورس (برنامج الماستر) بإحدى الجامعات البريطانية
بالنسبة ل سعيد فالمطلوب التقديم على أحد الجامعات الشريكة المذكورة بالموقع
إلا في حال هالاختصاص مانو موجود بأي جامعة من الجامعات الشريكة
ووقتها بينطلب كتابة مقالة إضافية بتشرح اسباب اختيار هالكورس ولازم تكون اسباب مقنعة
وبالنسبة ل تشيفنينغ ف بنستخدم محرك البحث الموجود في موقعهن
بنبدأ نبحث فيهن وحدة وحدة عن الكورس المطلوب ببساطة من خلال كتابة اسم الاختصاص بمحرك البحث داخل موقع الجامعة
وكل كورس بيكون إلو صفحة بتحكي بالتفصيل عنو ..والتقديم بيتم عن طريق خيار Apply بنفس الصفحة
وطبعاً مو بالضرورة يكون الكورس موجود بكل الجامعات ..بس غالباً رح يكون موجود بأكتر من جامعة
* كيفية اختيار الكورسات (3 على الأكثر) وترتيبها:
العامل الأهم برأيي هو محتوى الكورس نفسو
ومدى ارتباطو بالنقاط يللي حكينا فيها في بناء الأبليكيشن القوي
لازم تقرأ وصف ال modules تبع الكورس بالتفصيل
وتتأكد إنو هاد الشي يللي بدك ياه
وإنو فيك تذكر أسباب مقنعة لاختيارك ل هالكورس وارتباطو بخبرتك الماضية وأهدافك المستقبلية
وكيف رح يفيدك في تحقيقها (مطلوب منك تذكر معلومات مرتبطة بمحتوى الكورس بأربع مقالات لهيك برجع بقول مهم جداً فهم الاختصاص والكورس بعناية)
العوامل التانية ممكن تكون الجامعة نفسها (ترتيبها العام وقوتها باختصاصك تحديدا، المدينة، …)
بعد ما تختار ثلاث كورسات على الأكثر فالمطلوب ب سعيد إنك تكون مقدم على الجامعة وقت بتقدم الأبليكيشن، أما بتشيفنينغ فيك تقدم عالجامعات بعد ما تقدم الأبليكيشن
* التقديم على الكورس المختار من خلال موقع الجامعة:
التقديم بيكون عن طريق النت طبعاً وموقع الجامعة
بنفس صفحة الكورس بيكون في خيار (Apply)..بينطلب تعمل حساب ومن ثم تعبي أبليكيشن
والأشياء الأساسية يللي بتكون مطلوبة هي المعلومات الشخصية والدراسية والخبرة العملية وبينطلب رفع الشهادات الدراسية والايلتس (إن وجد)
وبالإضافة إلى ما سبق طبعاً أهم شي رسالة الدافع motivation letter أو متل ما بسموها بأغلب مواقع االجامعات البريطانية Personal statement
* أهم نصيحة عند كتابة رسالة الدوافع:
الابتعاد عن الكليشات و الجمل والقوالب الجاهزة
بحيث يللي بيقرأ الرسالة يكون متأكد إنك انت يللي كاتبها و أبسط طريقة لتحقيق هالشي
هي كتابة قصص شخصية حقيقية حصلت معك وإلها علاقة بالكورس وهالشي شبه مستحيل يكون متكرر مع حدا تاني
مثال:
محاضرة أو مادة معينة من بعدها صار عندك اهتمام بهالاختصاص
موقف في العمل او شي إيجابي او سلبي لاحظتو بشغلك ف نبهك عأهمية موضوع معين
خبر حقيقي حصل وإلو علاقة بمجالك وبعد ما سمعتو فتحتلك باب التفكير بشي معين
هيك القارئ بيكون واثق إنك انت يللي كاتب الرسالة وانو فعلاً عندك اهتمام حقيقي بدراسة هالكورس.
* نصائح ختامية:
1- الأشخاص يللي عندهن خبرة عملية
هالشي بيساعد كتير بالتقديم عالجامعات والمنحة. وبيعوض قلة المعدل.
ومهم جداً عرض الخبرة بطريقة واضحة ومترابطة والبناء عليها. وحتى الأشخاص يللي ما عندهن خبرة كبيرة.
.مهم يوضحو فهمهن لمجالهن وسوق العمل خارج مجال الجامعة ولو بذكر دورات أو تدريب بسيط أو عمل تطوعي
2- اطلب المساعدة من حدا عندو خبرة بهالمجال ويفضل يكون بيعرفك أو نفس الاختصاص
ولكن:
ضروري أولاً تكون قرأت كل شروط المنحة بنفسك وصفحات الأسئلة المتكررة FAQ
والفيديوهات يللي بتشرح عن المنحة بحيث ما تسأل أسئلة من نوعية
(شو الوراق المطلوب تقديمها… شو بتقدم المنحة..ايمتى مطلوب نرفع الشهادات..فورم رسالة التوصية)
من هالأسئلة يللي مذكور جوابها بأكتر من مكان
وفّر أسئلتك لشي أهم ومفيد إلك أكتر
طبعاً ممكن تقرأ عن ما سبق ويضل عندك بعض الاستفسارات بس بتكون عرفت أغلب الأشياء الضرورية
ومرة تانية، كل ما ذُكر هو رأي شخصي، و بالاسفل الموقع رسمي فيه الإرشادات للتقديم على منحة سعيد، وكيف بتتم عملية الاختيار ومواعيدها.
الموقع الرسمي لمنحة سعيد:
About our scholarships – Saïd Foundation (saidfoundation.org)
للعودة إلى صفحة تجارب الطلاب المقبولين بالمنح:
للعودة إلى الصفحة الرئيسية:
